ກອງປະຊຸມສະຫຼຸບຂະບວນການແຂ່ງຂັນ 5 ເປັນເຈົ້າ ຂອງພະແນກວິທະຍາສາດ ແລະ ເຕັກໂນໂລຊີ 23 8 2018

0
42

ຕອນບ່າຍເວລາ 13:30 ໂມງ ຂອງວັນທີ 23 / 8 / 2018 ທີ່ຫ້ອງປະຊຸມ ພະແນກວິທະຍາສາດ ແລະ ເຕັກໂນໂລຊີແຂວງຫຼວງພະບາງ ໄດ້ເປີດກອງປະຊຸມສະຫຼຸບຂະບວນການແຂ່ງຂັນ 5 ເປັນເຈົ້າ ປີ 2017 ແລະ ວາງຄາດໝາຍທິດທາງແຜນການ ປີ 2018 ຂອງກໍາມະບານຮາກຖານພະແນກວິທະຍາສາດ ແລະ ເຕັກໂນໂລຊີ ຄັ້ງທີ II. ໃຫ້ກຽດເປັນປະທານມີທ່ານ ສົມເພັດ ວັນນະກອນ ຮອງປະທານສະຫະພັນກໍາມະບານແຂວງຫຼວງພະບາງ, ມີ ທ່ານ ວົງສະຫວັດ ໂສມມະລັດ ຮອງເລຂາໜ່ວຍພັກ ພວຕ ແລະ ທ່ານ ທອງເພັດ ພົມມະຈັກ ຮອງກໍາມະບານຮາກຖານ ພວຕ. ມີຕາງໜ້າກໍາມະບານຮາກຖານພະແນກການອ້ອມຂ້າງ, ຕາງໜ້າອົງການຈັດຕັ້ງມະຫາຊົນ ແລະ ສະມາຊິກກໍາມະບານ ເຂົ້າຮ່ວມທັງໝົດ 30 ສະຫາຍ.

ຈຸດປະສົງຂອງກອງປະຊຸມແມ່ນ ສະຫຼຸບຂະບວນການແຂ່ງຂັນ 5 ເປັນເຈົ້າ ປີ 2017 ແລະ ວາງຄາດໝາຍ ທິດທາງແຜນການ ປີ 2018 ຂອງກໍາມະບານຮາກຖານພະແນກວິທະຍາສາດ ແລະ ເຕັກໂນໂລຊີ ຄັ້ງທີ II, ຜ່ານຂໍ້ຕົກລົງຂອງປະທານສະຫະພັນກໍາມະບານແຂວງ ວ່າດ້ວຍການຢັ້ງຢືນຮັບຮອງເອົາກໍາມະບານຮາກຖານ ພະແນກວິທະຍາສາດ ແລະ ເຕັກໂນໂລຊີ ທີ່ຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າສໍາເລັດຮອບທີ II, ໃນພິທີຍັງມີການມອບໃບຢັ້ງຢືນ 5 ເປັນເຈົ້າ ໃຫ້ກຽດຂຶ້ນມອບໂດຍທ່ານຮອງປະທານສະຫະພັນກໍາມະບານແຂວງ ຮັບໂດຍຮອງກໍາມະບານຮາກຖານ ພວຕ, ຈາກນັ້ນ ຕາງໜ້າສະມາຊິກກໍາມະບານກໍ່ໄດ້ຂຶ້ນຈັບມືແຂ່ງຂັນ, ນອກຈາກນີ້ ທ່ານ ສົມເພັດ ວັນນະກອນ ຮອງປະທານສະຫະພັນກໍາມະບານແຂວງກໍ່ໄດ້ມີຄໍາເຫັນໂອ້ລົມຕໍ່ພິທີ ບາງຕອນທ່ານໄດ້ເນັ້ນໜັກໃຫ້ສະມາຊິກກໍາມະບານໃຫ້ເອົາໃຈໃສ່ເສີມຂະຫຍາຍຄົ້ນຄວ້າຂະບວນການແຂ່ງຂັນ 5 ເປັນເຈົ້າ ເຂົ້າໃນຂົງເຂດວິທະຍາສາດ ແລະ ເຕັກໂນໂລຊີ ເພື່ອໃຫ້ສະມາຊິກກໍາມະບານທຸກສະຫາຍມີຄວາມຮູ້ຄວາມສາມາດທີ່ພົ້ນເດັ່ນ. ຮອດເວລາ 15:30 ໂມງ ພິທີໄດ້ປິດລົງຢ່າງຈົບງາມ.

LEAVE A REPLY

Please enter your comment!
Please enter your name here